Դատախազության պատմությունը ոչ միայն զուգորդվում է ընդհանուր դատական համակարգի պատմությամբ, այլև չի կարող դիտարկվել փաստաբանության պատմությունից առանձին: 
Իրավաբանական ֆակուլտետներում լսարանային քննարկումները հիմնականում ծավալվում էին դատախազի և փաստաբանի մասնագիտական աշխատանքների նրբության, առողջ մրցակցության սկզբունքի շուրջ:

Մարդու իրավունքների պաշտպանության հարցերում էլ հակասությունները, ինչպես նաև մասնագիտական բանավեճերը շատ էին մեղադրանքի և պաշտպանության կողմերի միջև:
Տարիներ առաջ հնարավոր չէր պատկերացնել, բայց այսօր իրողություն է, որ փորձ արվեց անգամ միատեսակ տուգանքի ենթարկել դատախազներին ու փաստաբաններին:
Լինելով բարիկադի հակառակ կողմերում՝ այս խնդիրը կասեցնելու երկրորդ կարծիք չկա: Մեր համակարգերն ունեն ընդհանուր պատմություն, նաև ընդհանուր խնդիրներ:

Շնորհավորում ենք Դատախազության կազմավորման հարյուրամյակը: Դատախազության աշխատողների պրոֆեսիոնալիզմի, շրջահայացության և հզոր համակարգ կերտելու արդյունքում մենք ունենալու ենք առավել պաշտպանված, դատական սխալները հնարավորինս բացառող արդարադատության համակարգ:

 ՀՀ փաստաբանների պալատի նախագահ՝ Արա Զոհրաբյան