Մեկնարկել են ՀՀ փաստաբանների պալատի խորհրդի ընտրությունները։

Հերթական ընդհանուր ժողովի օրակարգում երեք հարց է՝ Պալատի խորհրդի ընտրություն, կարգապահական գործ պատրաստող անձանց ընտրություն և Փաստաբանի օր սահմանելու վերաբերյալ քվեարկություն։ Ընտրությանը մասնակցող փաստաբանների  թիվը՝ 1779:

Ինչպես և նախատեսված էր, քվեարկությունը սկսել է ժամը 10-ից, տևելու է մինչև 17-ը։ Քվեարկության ավարտից անմիջապես հետո հաշվիչ հանձնաժողովը կսկսի հաշվարկի գործընթացը։ 

Պալատի խորհրդի անդամների թեկնածուները 39-ն են, կարգապահական գործ պատրաստողների թեկնածուները 20-ն են:

ՔՎԵԱՐԿՈՒԹՅԱՆ ԿԱՐԳ

1. Հաշվիչ հանձնաժողովի նախագահը քվեարկության օրը և ժամին` հայտարարում է քվեարկության սկիզբը և թույլատրում ընտրողների մուտքը քվեարկության սենյակ:
2. Քվեարկության սենյակում հաշվիչ հանձնաժողովի անդամներից և քվեարկողներից բացի, կարող են ներկա լինել թեկնածուների մեկական վստահված անձինք, դիտորդները: Թեկնածուն քվեարկության ընթացքում քվեարկության սենյակում կարող է գտնվել միայն քվեարկությանը մասնակցելու համար:
3. Քվեարկության սենյակում միաժամանակ չի կարող գտնվել Հաշվիչ հանձնաժողովի նախագահի կողմից որոշված քանակից ավելի քվեարկող: Քվեարկության բնականոն ընթացքն ապահովելու համար Հաշվիչ հանձնաժողովի նախագահն իրավունք ունի ընտրողներին քվեարկության սենյակ թողնելու հերթով` մեկ-մեկ:
4. Գաղտնի քվեարկության մասնակիցը` փաստաբանների պալատի անդամը (այսուհետ նաև` ընտրող), մոտենում է համապատասխան սեղանին ներկայացնելով անձը հաստատող փաստաթուղթը կամ փաստաբանի վկայականը: Հաշվիչ հանձնաժողովի անդամը ստուգում է ընտրողի տվյալները, որից հետո ընտրողը ստորագրում է իր անվան դիմաց և նրան տրամադրվում են քվեաթերթիկներ: 
Քվեաթերթիկները տպագրված են՝
 ՀՀ փաստաբանների պալատի խորհրդի անդամների ընտրության քվեաթերթիկները՝ սպիտակ գույնի թղթի վրա,
 ՀՀ փաստաբանների պալատի կարգապահական գործը նախապատրաստող անձանց ընտրության քվեաթերթիկները՝ դեղին գույնի թղթի վրա,
 «Փաստաբանի օր» սահմանելու մասին հարցի ընտրության քվեաթերթիկները՝ կանաչ գույնի թղթի վրա։
5. Քվեաթերթիկները ստանալուց հետո ընտրողը մոտենում է քվեախցիկին և կատարում իր ընտրությունը։ Ընտրողը քվեախցիկում յուրաքանչյուր քվեաթերթիկն առանձին-առանձին քառապատիկ ծալում է և քվեախցիկից դուրս գալուց հետո այդ վիճակով գցում է նշված խմբի համար առանձնացված քվեատուփի մեջ: Ընտրությունը կատարելուց անմիջապես հետո ընտրողը հեռանում է քվեարկության կատարման վայրից:
6. Քվեարկության ժամանակ ընտրողը նշում է կատարում իր նախընտրած թեկնածուների կամ տարբերակի օգտին, որը չպետք է գերազանցի` 
- Փաստաբանների պալատի խորհրդի անդամների ընտրության ժամանակ` 12 (տասներկու) թեկնածուների թվաքանակը, 
- գործը նախապատրաստող անձանց թեկնածուների ընտրության ժամանակ` 20 (քսան) թեկնածուների թվաքանակը, իսկ
- «Փաստաբանի օր» սահմանելու մասին օրակարգային հարցի քվեարկության ժամանակ՝ 1 (մեկ) տարբերակը։
Սույն կետում նշված պահանջը խախտելու դեպքում քվեաթերթիկը կհամարվի անվավեր:
7. Քվեարկությանը մասնակցելու դժվարություններ ունեցող ընտրողների համար քվեարկությունը մատչելի դարձնելու նպատակով Հաշվիչ հանձնաժողովը պարտավոր է սահմանել լրացուցիչ հնարավորություններ` ապահովելով քվեարկողի կամքի ազատ արտահայտման հնարավորությունը և քվեարկության գաղտնիությունը:
8. Ընտրողը քվեարկությանը մասնակցում է անձամբ: Լիազորված անձանց միջոցով քվեարկությունն արգելվում է: 
9. Քվեաթերթիկն ինքնուրույն լրացնելու հնարավորություն չունեցող ընտրողն իրավունք ունի Հաշվիչ հանձնաժողովի նախագահին տեղեկացնելուց հետո քվեարկության խցիկ հրավիրելու այլ անձի, որը չպետք է լինի Հաշվիչ հանձնաժողովի անդամ կամ վստահված անձ: Անձն իրավունք ունի օգնելու քվեաթերթիկն ինքնուրույն լրացնելու հնարավորություն չունեցող միայն մեկ ընտրողի: Բացի նշված դեպքից, քվեաթերթիկը լրացնելիս քվեարկության խցիկում այլ անձի ներկայությունն արգելվում է։
10. Եթե ընտրողը կարծում է, որ քվեաթերթիկը սխալ է լրացրել կամ վնասել է, ապա կարող է դիմել Հաշվիչ հանձնաժողովի նախագահին` նոր քվեաթերթիկ ստանալու համար: Հաշվիչ հանձնաժողովի նախագահի հանձնարարությամբ ընտրողին հատկացվում է նոր քվեաթերթիկ, ընտրողների ցուցակում կատարվում է համապատասխան նշում տվյալ ընտրողի անվան, ազգանվան դիմաց: Սխալ լրացված (վնասված) քվեաթերթիկն անհապաղ մարվում է: