Հունիսի 7-ին ՀՀ փաստաբանների պալատի և ՀՀ մարդու իրավունքների պաշտպանի միջև ստորագրվել է  համագործակցության հուշագիր: Հուշագիրը ստորագրել են ՀՀ փաստաբանների պալատի նախագահ Արա Զոհրաբյանը և ՀՀ մարդու իրավունքների պաշտպան Արման Թաթոյանը:  

ՀՀ փաստաբանների պալատի նախագահ Արա Զոհրաբյանը շնորհավորել է   երկու իրավապաշտպան կառույցներին  հուշագրի ստորագրմամբ որակական նոր հարթակի վրա դրված համագործակցության առթիվ: Անդրադառնալով Մարդու իրավունքների պաշտպանի ինստիտուտին՝ նա համագործակցության համար  առանձնացրել է ՄԻՊ-ի  լիազորությունների  այն շրջանակը, համաձայն որի Մարդու իրավունքների պաշտպանն  անարգել կարող է այցելել զորամիավորումներ, ձերբակալման վայրեր, նախնական կալանք ու քրեական պատիժ իրականացնող հիմնարկներ: Պալատի նախագահը կարևորել է նաև այն, որ  ՄԻՊ-ը կարող է Հայաստանի Հանրապետության սահմանադրական դատարան  ներկայացնել օրենքների նորմերի սահմանադրականությանն առնչվող  դիմումներ: Նա հիշեցրել  է, որ  քաղաքացին կարող է ՍԴ դիմել, եթե սպառում  է ներպետական երեք ատյանները՝ հավելելով, որ այս տեսանկյունից  հուշագրով ամրագրված համագործակցությունը նպաստելու է  Մարդու իրավունքների պաշտպանության ընդհանուր գործին: Արա Զոհրաբյանը  նաև խոսել է  փաստաբանների կողմից  բարձրաձայնվող՝ սահմանափակած վայրերում Մարդու իրավունքները խախտելու, նաև խոշտանգման դեպքերից: Նա շեշտել է, որ այդ պարագայում  փաստաբանները հնարավորություն կունենան  ՄԻՊ դիմելու միջոցով արագ արձագանքման խմբով արձանագրել նմանատիպ դեպքերը:

ՀՀ մարդու իրավունքների պաշտպան Արման Թաթոյանը, շնորհավորել է ներկաներին հուշագրի ստորագրման կապակցությամբ՝  նշելով,  որ այն նոր որակ է բերելու  Պալատի հետ համագործակցությանը: Նա ընդգծել է, որ ի տարբերություն սովորական հուշագրերի, այս հուշագիրը  ցանկությունների ամբողջություն չէ, այլ՝ համագործակցության կոնկրետ մեխանիզմների ներդրում: Պաշտպանն ասել է, որ Փաստաբանները մեր երկրի ժողովրդավարական ինստիտուտների կարևոր տարրերից են: Նա նշել է, որ փաստաբաններն  առանձին գործերով իրավաբանական օգնություն ցուցաբերելիս՝ բախվում են  խնդիրների, որոնք Մարդու իրավունքների պաշտպանի հետաքրքրության տիրույթում են: Առանձնացնելով Մարդու իրավունքների պաշտպանի գրասենյակի համար հուշագրում առկա առաջնահերթությունները՝ Արման Թաթոյանը կարևորել է   Փասաբանական դպրոցում ունկնդիրների համար ՄԻՊ աշխատակազմի  կողմից դասընթացներ  վարելու հնարավորությունը,  ինչը  թույլ է տալու  ՄԻՊ-ին ավելի ակտիվ ու լիարժեք ինտեգրվել իրավապաշտպան հանրության ոլորտ:

Հուշագիրն ուժի մեջ է մտել ստորագրման պահից:

Բեռնել հուշագրի տեքստը: